Булимијата претставува сериозно, потенцијално животозагрозувачко нарушување во исхраната. Лицата кои страдаат од булимија редовно се прејадуваат, а потоа на нездрав начин се обидуваат да се ослободат од внесените калории, со цел да избегнат зголемување на телесната тежина.
По епизодите на неконтролирано внесување на големо количество храна, лицата со булимија ја исфрлаат храната со форсирано повраќање или прекумерно користење на лаксативи и диуретици. Некои лица ги согоруваат дополнителните калории со екстремно вежбање.
Булимијата често е проследена со депресија, ниска самодоверба и анксиозност.
Адолесцентите се најпогодена возрасна група. Всушност, кај околу 75% од луѓето кои страдаат од булимија болеста се манифестирала пред 22-годишна возраст, најчесто околу 15 и 16-годишна возраст. Жените почесто завршуваат во канџите на булимијата отколку мажите.
Симптоми и предупредувачки знаци
Како да познаете дали страдате од булимија?
- Живеете во страв од здебелување и сте преокупирани со тежината и внесените калории;
- Чувствувате дека немате контрола при јадењето и се прејадувате;
- Јадете додека не почувствувате болка во стомакот или нагон за повраќање;
- По прејадувањето чувствувате вина и срам или сте депресивни;
- Прекумерно употребувате лаксативи и диуретици;
- Прекумерно користите суплементи или чаеви за слабеење;
- Екстремно вежбате;
- Форсирано повраќате;
- Имате болно и воспалено грло како резултат на честото повраќање;
- Страдате од болки во стомакот и подуеност.
Како да познаете личност која страда од булимија?
Бидејќи најголем дел од луѓето со булимија се со нормална телесна тежина, дури во одредени случаи и прекумерна тежина, тешко може да се увиди дека имаат здравствен проблем. Треба да бидете загрижени доколку личноста:
- Постојано зборува негативно за изгледот на своето тело;
- Редовно се жали за тежината и покажува страв од здебелување;
- Го посетува тоалетот по секој оброк;
- По посетата на тоалет има крвави очи и отечени образи;
- На прстите на рацете има лузни или рани предизвикани од ставање на прстите длабоко во усната шуплина со цел провокација на повраќање;
- Прекумерно и форсирано вежба;
- Има оштетување на бојата и квалитетот на забите како резултат на форсираното повраќање;
- Има тенка и ретка коса.
Покрај горенаведените симптоми и знаци, лицата со булимија често страдаат од депресија, ниска самодоверба, анксиозност и злоупотреба на алкохол и лекови.
Компликации
Како резултат на намалениот внес на хранливи материи во организмот, кај луѓето кои страдаат од булимија постои реална опасност да биде засегнат секој орган од телото. Најчесто се јавуваат следниве компликации:
- Губење на свест;
- Дехидратација;
- Хемороиди;
- Ладни раце и нозе како резултат на слаба циркулација;
- Нарушување на нивото на електролити;
- Проблеми со бубрезите;
- Хормонални нарушувања (задоцнување на пубертет, нередовен менструален циклус, ановулација и др.);
- Заостанување во растот;
- Руптура на хранопровод;
- Намалување на коскената густина;
- Аритмии.
Како да ѝ помогнете на личност со булимија?
Доколку некој член од вашето семејство или близок пријател страда од булимија, следниве совети ќе ве насочат како можете да помогнете:
- Понудете ја вашата безусловна поддршка. Пред да разговарате, треба да имате на ум дека лицето кое страда од булимија подолго време живее со оваа тајна за која сигурно чувствува огромен срам. Доколку се реши да ви се отвори, покажете дека навистина се грижите. Понудете ја безусловно вашата поддршка.
- Избегнувајте тактики со закани, заплашување или обвинување. Со оглед на тоа што ова заболување е поврзано со стресни ситуации, ниска самодоверба и срам, негативниот пристап само ќе ја влоши состојбата. Затоа, обидете се да помогнете без осудување.
- Поставете добар пример. Доколку се храните здраво, вежбате редовно, практикувате здрави животни навики, тогаш тежината на советите и помошта која ја нудите ќе биде поголема и ќе бидете сфатени посериозно.
- Побарајте помош од стручно лице. Освен вашата, потребна е и стручна медицинска помош. Колку подолго е присутно заболувањето, толку е потешко телото да се врати во нормала. Затоа е потребна консултација со доктор, кој освен што ќе постави точна дијагноза, ќе даде соодветен третман за булимијата и евентуално за другите пропратни заболувања.
- Прифатете ги ограничувањата. Колку и да е голема вашата желба да помогнете, сепак потребно е примарно личноста која страда од булимија да има волја да се извлече од канџите на ова сериозно заболување.
