Тортичките со боја на рубин, кои популарно се нарекуваат „црвено кадифе“, се одличен финиш на празничен оброк. Привлечните тортички мамат со црвената боја и сунѓерестата текстура, а екстремно брзо исчезнуваат од чинијата.
Состојки за тестото
| 2½ шолји | сенаменско бело брашно |
| 1 мала лажичка | какао во прав |
| 1 мала лажичка | прашок за пециво |
| 1 мала лажичка | сол |
| 1½ шолји | шеќер |
| 1½ шолји | масло |
| 1 шолја | матеница* |
| 2 | јајца |
| 1 мала лажичка | јаболков оцет |
| 1 мала лажичка | екстракт од ванила |
| 18g | црвена прехранбена боја |
*Доколку немате матеница, можете да направите замена. Во шолја ставете една супена лажица јаболков оцет и дополнете со млеко. Промешајте и оставете ја да стои 5-10 минути.
Состојки за филот
| 450g | шеќер во прав |
| 225g | крем сирење |
| 100g | путер или маргарин |
| 1 мала лажичка | екстракт од ванила |
Подготовка на тестото
- Во длабок сад измешајте ги брашното, какаото, прашокот за пециво и солта.
- Во посебен длабок сад ставете ги шеќерот, матеницата, маслото, јајцата и оцетот. Измешајте лесно со виљушка.
- Во течната смеса од шеќер и јајца додајте ја сувата смеса со брашното и мешајте со електричен мискер на средна брзина додека смесата не се изедначи.
- Додајте ги прехранбената боја и екстрактот од ванила. Продолжете да матите со миксер на мала брзина додека бојата не се распореди подеднакво низ смесата.
- Загрејте ја рерната на температура од 180 степени.
- Премачкајте ја тавата за мафини со малку масло и со лажица наполнете ги калапите, но не догоре. Наполнете 2/3 од нив.
- Ставете ја тавата во рерна и печете 20-тина минути. За да дознаете дали тестото е печено, прободете една тортичка со чепкалка за заби. Ако излезе чиста, тоа е знак дека треба да ги извадите од рерна.
- Оставете ги да оладат пред да ги филувате.
Подготовка на филот
- Оставете ги крем сирењето и путерот на собна температура 20-тина минути.
- Во ист сад додајте ги сите состојки и мешајте со електричен мискер додека смесата не стане мазна како крем.
- Пред да ги филувате тортичките, препорачливо е да го оставите филот во фрижидер 15 минути за да се олади.
Полесна варијанта на филот: За побрза и поедноставна подготовка можете да ги украсите тортичките со изматена слатка павлака.
Со готварски шприц нанесете од филот на тортичките и украсете по желба со рендано чоколадо, парче овошје или колоритни украси за колачи и торти.
