Катастрофалниот пожар во дискотеката „Пулс“ во Кочани одзеде уште еден млад живот.
Почина 24-годишниот Стојанче Стефанов кој се лекуваше во Воено-медицинската академија во Белград. Тој бил интубиран и во критична состојба во изминатиот месец.
„Станува збор за пациент, кој од првиот ден, согласно извршената првична тријажа од медицинските тимови е веднаш упатен на лекување во Воено-медицинската академија во Белград и кој беше интубиран и во критична состојба во изминатиот месец. Станува збор за пациент со 27 отсто зафатеност со изгореници и сериозни повреди од вдишување на чад. Во ВМА е опериран на 4 април и поставен на ЕКМО апарат, преку кој се оксигенира крвта преку машина, заради вдишаниот чад. Но, заради сериозноста на повредите, тој поголем дел од хоспитализацијата бил нестабилен и во тешка општа состојба. Министерството за здравство изразува најдлабоко сочувство до фамилијата и до сите засегнати од трагедијата во Кочани“ – изјавија од Министерството за здравство.
Стојанче е 62-рата жртва во пожарот кој изби на 16 март во „Пулс“ во Кочани.
