Натали Портман изгледа прекрасно на насловната страница на ноемвриското издание на британското Elle. 32-годишната Оскаровка привлекува погледи во бела кошула од парискиот бренд Барбара Буи и блескава јакна од Версаче.
За модниот едиторијал филмската ѕвезда позираше уште и во креации од Стела Мекартни, Келвин Клајн, Родарте, Прада и Chloé, а се разбира и од Кристијан Диор, модната куќа со која Натали има долгогодишна соработка.
Фотографиите се дело на модниот фотограф Каи Зи Фенг.
Во интервјуто за списанието, Натали зборувала за феминизмот, мајчинството и својот омилен филм „Dirty Dancing“.
За феминизмот: „Сакам секоја верзија од жената и од мажот да биде возможна. Сакам жените и мажите да имаат можност да бидат или само родители или работници со полно работно време или која било комбинација од нив. Сакам да можат да прават сè што сакаат сексуално без да бидат нарекувани со најразлични имиња. Сакам да им биде дозволено да бидат слаби и силни и среќни и тажни – односно да бидат луѓе. Заблудата во Холивуд е тоа што ако правиш „феминистичка“ приказна, жената растура и победува. Тоа не е феминистка, тоа е мачо. И филм за слаба, ранлива жена може да биде феминистички ако покажува реална личност.“
За филмот „Dirty Dancing“: „До денес тоа е филмот кој го имам гледано најмногу во животот. Не можам да зборувам за тоа премногу, затоа што ќе ми се насолзат очите. Има и други филмови кои ги сакам, но ниту еден друг филм не сум го гледала повторно и повторно.“
За мајчинството: „Обожавам да сум мајка, но тоа вклучува многу поинтензивна работа од тоа да си актерка – одењето на работа ми изгледа како слободен ден. Не дека сакам слободен ден од улогата на мајка, само што веројатно претходно имав впечаток дека мајките не работат. Но, тие работат и тоа повеќе од секој друг.“
