Бинди Ирвин и Чендлер Пауел се заколнаа на вечна љубов во „Australia Zoo“, зоолошката градина основана од семејството Ирвин во 1970 година.
21-годишната ќерка на ловецот на крокодили Стив Ирвин сподели дека се венчала со својот избраник пред тројца гости и многу животни.
На свадбата присуствувале нејзината мајка Тери, нејзиниот брат Роберт и најдобриот пријател на нејзиниот покоен татко.
„Направивме мала церемонија и се омажив за мојот најдобар пријател. Нема зборови кои можат да опишат колку љубов и светлина има во моето срце сега. Го планиравме овој прекрасен ден речиси една година, но моравме да промениме сè, затоа што немавме гости на нашата свадба. Тоа беше многу тешка одлука, но важно е сите да се безбедни. Посакувавме нашите роднини и пријатели да можеа да бидат со нас, но убаво е што ќе можеме да споделиме фотографии и видеа.. Мама ми помогна да се подготвам, Роберт ме испрати до олтарот, Чендлер ми стана сопруг и заедно запаливме свеќа во спомен на Тато... До сите кои го читаат ова: чувајте се, одржувајте социјална дистанца и запомнете дека ЉУБОВТА ПОБЕДУВА!“ – сподели Бинди.
Младенците се запознаа во 2013 година, а се верија во јули минатата година.
Бинди е ќерка на љубителот на животни Стив Ирвин, кој почина по убод од риба раја на 44-годишна возраст.
