Посветен учител од Кина, кој ги изгуби двете раце, пронајде начин да држи настава и покрај својот хендикеп. Тој им предава на деца во училиште кое останало без наставници.
Ѓанг Шенгфа ги изгубил двете раце како последица на електричен шок во 1996 година. Несреќата се случила додека им помагал на своите соседи да поправат жици под висок напон.
Шенгфа повеќе од 20 години бил учител по кинески јазик, но по несреќната случка, морал да престане да работи и да се пензионира.
Во 2003 година, училиштето во Јунан каде сега работи Ѓанг било во потрага по наставник. Тоа се наоѓало во планински предел и не ги нудело потребните услови за работа, па учителите не биле заинтересирани за работното место.
Кога локалните власти го контактирале Ѓанг и му понудиле да ги држи предавањата, тој не се ни двоумел дали да ја прифати понудата, иако веќе бил во пензија. „Селото е многу сиромашно. Никои учители немаат желба да работат таму. Сите млади и образовани луѓе од селото се иселуваат за да најдат работа на друго место. Гледам дека децата може да го изгубат своето право на образование“ – изјавил 41-годишниот Кинез за People's Daily.
И покрај тоа што нема горни екстремитети, Ѓанг дава сè од себе за да може посветено да ги извршува своите работни обврски и да ги образува сиромашните деца кои имаат желба да учат. Тој научил да пишува со креда врзана за остатокот од неговата рака и посетувал часови по калиграфија за да го усоврши својот ракопис.
Импресивниот учител пешачи по 8 километри секој ден до своето работно место.
Откако во 2013 година се распространи приказната за Ѓанг, нему му била понудена нова работа со многу повисока плата и подобри услови, но тој се разбира не ја прифатил и останал покрај децата на кои им предавал веќе долги години.
Шенгфа вели дека никогаш не треба да се жалиме и секогаш да гледаме на физичките предизвици како на позитивно нешто во животот.
Неговите напори резултирале со огромни промени во селото. Ѓанг е прекрасен пример за своите ученици од кого можат да научат и важни животни лекции.
