Татко, на кого не му останува уште долго време живот, сними песна за идните свадби на ќеркичките.
Мајкл Хуго во април минатата година дознал дека има неизлечив рак на мозокот во четврт стадиум. Тој отсекогаш сонувал да танцува со ќерките на нивните свадбени прослави. За жал, лицата со неговата дијагноза живеат околу 14 месеци, па најверојатно, тој сон никогаш нема да се оствари.
Сакајќи да направи нешто специјално за своите девојчиња, Бриџит (6) и Брук (7), Мајкл испрати апел преку социјалните мрежи до кантри пејачот Тим Мекгро за да го замоли да снимат песна која ќе биде пуштена на нивните свадби.
Апелот стигна до Тим и тој се согласил да сними дует од неговиот хит „My Liittle Girl“ со Мајкл.
Покрај специјалната свадбена песна, Хуго на ќерките се обидува за кратко време да им пренесе што повеќе животни лекции и им има напишано пораки на картички за нивните идни родендени.
„Се обидувам да им кажам колку многу ги сакам без разлика дали сум тука или не“ – вели тој.
Семејството сподели фотографии од снимањето, но видеата ќе бидат зачувани за свадбите на Бриџит и Брук.
„Ти благодариме Тим Мекгро. Ти создаваш музика која ги допира срцата на луѓето и ги потсетува на она што е важно. Ти си неверојатен фамилијарен човек и татко на девојчиња, исто како Мајкл... Песната со Мајкл ќе биде комбинирана со видео кое ќе го чува нашето семејство“ – пишува на Facebook сопругата на Мајкл, Ванеса.
„Се молиме Мајкл да биде тука и да пее наглас кога Бриџит и Брук ќе пораснат и ќе се омажат. Но, ако Бог има друг план, Мајкл засекогаш ќе биде тука со нас“ – додава таа.
