Келси Хачер ги донесе на свет своите две мали чуда. Мајката од Алабама, која е родена со две матки и забремени истовремено во двете, се породи и роди здрави бебенца.
32-годишната Американка и нејзиниот сопруг добија две ќеркички, кои се родија во различни денови. Малата Рокси Лејла се родила на 19 декември по природен пат, а нејзината сестричка Ребел Лејкен се родила на 20 декември со царски рез.
„Тие одлучија дека не е доволно што статистички се толку ретки, што мораше да имаат и различни родендени“ – рекла мајката, алудирајќи на фактот што шансите жена да биде бремена истовремено во двете матки се „една на 50 милиони“.
Келси дознала дека има две матки и два цервикси кога имала 17 години. Таа и нејзиниот сопруг Кајлеб веќе имаат и три други деца и досега немала никакви компликации во бременостите.
„Не знам што се случи поразлично овојпат, но лудо е“ – со насмевка изјавила Хачер.
Децата на Келси и Кајлеб имаат 7, 4 и 2 години.
