Вечната стилска романса на генијалниот дизајнер Убер де Живанши и неговата харизматична муза Одри Хепберн има специјално место во модната и филмската историја.
Нивната приказна започна со снимањето на „Sabrina“ во 1953 година, кога Одри инсистирала нејзината облека за филмот да биде дизајнирана од Живанши. Присетувајќи се на нивната прва средба, Живанши има изјавено: „Мислам дека претходно таа немаше видено висока мода. Дојде во маичка со риги и панталони и проба неколку примероци. Јас бев зафатен со подготовките за следната колекција и ѝ реков дека не можам да прифатам, но таа беше упорна. Ме покани на вечера, што беше мошне необично за жена во тоа време и на таа вечера јас сфатив дека таа е ангел.“
„Поради неа имав можност да го променам изгледот на холивудските икони, а таа бараше во нејзините договори да стои дека јас ќе ги дизајнирам нејзините алишта. Тоа беа први договори од таков вид“ - рекол тој пред две години.
И двајцата беа во нивните 20-ти години кога се запознаа
Одри во фустан дизајниран од Живанши за „Sabrina“
Во тие моменти се родило не само нераскинливо деловно партнерство, туку и пријателство кое траеше до нејзината смрт. По „Sabrina“, продолжија да се нижат филмските проекти на кои соработуваа.
Одри носеше креација на Живанши и кога примаше Оскар за Најдобра актерка за „Roman Holiday“ (1954)
Холивудската икона во креација од Живанши за „Funny Face“ (1957)
Одри како заштитно лице на парфемот L’Interdit на Живанши (1958)
Нивната соработка резултираше со раѓањето на иконското „мало црно фустанче“. За ликот на Холи Голајтли во „Breakfast at Tiffany's“, славниот дизајнер го креираше ултра популарниот црн фустан.
Одри во оригиналниот мал црн фустан креиран од Живанши (1961)
Одри во креација од Живанши за фотосесија за Вог (1963)
Во фустан од чипка и складна маска дизајнирани од Живанши за филмот How to Steal a Million (1966)
Живанши беше до Хепберн до самиот крај. Кога нејзиниот живот згаснуваше како последица на рак, нејзината желба беше да ги помине последните денови во Швајцарија. Бидејќи не можеше да лета со комерцијален авион, Живанши организира превоз со приватен авион. Славната актерка го помина последниот Божиќ со семејството и пријатели, меѓу кои беше и Живанши, пред да почине на 20 јануари 1993 година.
Пред смртта, Хепберн му подарила сино палто и му рекла: „Кога си тажен, носи го ова и ќе ти даде храброст“. „Од Женева до Париз липав во палтото кое таа ми го даде“ - изјавил тој.
Вчера светот го обиколи тажната вест за смртта на Живанши.
Славното дуо во 1978 година
На прошетка во Париз (1982)
Одри со Живанши во негова креација (1988)
Одри и Живанши на бал во Њујорк (1991)
Во неговото ателје во Париз (1991)
