Многу родители сметаат дека нивните малечки не се доволно зрели за да извршуваат домашни обврски или пак дека со давањето на задачи им го уништуваат детството и им го кратат времето за игра. За жал, тоа е многу погрешно, бидејќи детето од мали нозе треба да се научи да помага и да сфати дека мама не е единствената личност одговорна за грижата за домот.
Преку обврските, детето се учи на одговорност и се чувствува дека е важно и корисно, а на родителите им се олеснува мисијата да израснат вредно дете кое не е разгалено.
Стратешки вклучувајте го вашето дете во грижата за домот. Во зависност од неговата возраст, ова се обврските кои тоа може да ги исполнува:
1-2 години
По дувањето на првата роденденска свеќичка научете го вашето малечко да:
- Помага при собирањето играчки;
- Ги става валканите алишта во корпата;
- Помага при чистењето на нередот кој го направило;
- Ви носи определен предмет како чевли, играчка, облека и сл. кој сте му го побарале.
Доколку детето сака да ви помогне и во друга домашна обврска, а таа не претставува опасност за него, дозволете му да помогне. Дури и тоа да значи дека ќе изгубите двојно повеќе време при исполнувањето.
2-3 години
На оваа возраст детето може да ги извршува сите горенаведени обврски, како и да:
- Го брише истурениот чај, сок или друга течност;
- Ги собира играчките и сликовниците;
- Го става некршливиот прибор за јадење во машината за миење садови;
- Носи чинија од масата до мијалникот по оброкот;
- Реди салфетки при поставувањето на масата;
- Помага при местење на креветот;
- Помага при хранењето на домашните миленици;
- Обесува крпа или облека на закачалка;
- Налева вода во чаша од мал бокал или шише;
- Ја пренесува сувата облека до одредено место;
- Дипли помали крпи;
- Се обидува да чисти со правосмукалка.
3-4 години
Меѓу 3 и 4 години детето може да ги извршува сите горенаведени обврски, како и да:
- Брише прашина од мебелот;
- Ги става здиплените алишта на своето место;
- Помага при вадењето на чиниите и приборот од машината за миење садови;
- Помага при рециклирање;
- Се облекува без ваша помош.
4-6 години
На возраст од 4 до 6 години детето може да ги извршува сите горенаведени обврски, како и да:
- Си го мести креветот;
- Ја раскрева масата по јадење;
- Откорнува тревки од градината;
- Наводнува цвеќиња;
- Мие пластични чинии во мијалникот;
- Си прави оброк со житарки и млеко;
- Помага при правењето на други оброци;
- Ги сортира испраните чорапи;
- Ги храни домашните миленици;
- Реди книги на полици;
- Го мети подот со мала метла.
6-8 години
На оваа возраст детето може да ги извршува сите горенаведени обврски, како и да:
- Помага во чистењето на бањата/кујната;
- Дипли сува облека;
- Го чисти подот со џогер;
- Брише чинии со сува крпа;
- Се јавува на телефон.
Од оваа возраст можете да создадете распоред за извршување на домашните обврски, кој ќе го поставите на ѕидот или на фрижидерот.
8-10 години
На возраст од 8 до 10 години детето може да ги извршува сите горенаведени обврски, како и да:
- Мие садови;
- Се грижи за домашните миленици;
- Подготви едноставни оброци без помош;
- Собира лисја со грибло;
- Учи како да ја користи машината за перење;
- Ја спростира мократа облека на жица.
Над 10 години
Откако детето ќе наполни 10 години, тоа може да ги извршува сите горенаведени обврски, како и да:
- Ги наводнува цвеќињата;
- Го мие семејниот автомобил со надзор од возрасен;
- Го фрла ѓубрето во контејнер;
- Ја поставува масата пред јадење;
- Ги става купените производи на своето место.
Дополнителни совети:
- Не го присилувајте вашето дете. Бидете покрај него за да го мотивирате и да го насочувате низ обврските. Покажувајте му бавно и трпеливо како се извршува секоја задача за тоа да може да ги копира вашите движења.
- Не очекувајте совршенство.
- Доколку имате можност, купете опрема за чистење во мала верзија, како мала метла, мала крпа и сл.
- Не му плаќајте на малото дете за извршување на домашните обврски. Да, детето треба да научи како се заработува и како да раководи со пари, но не преку извршување обврски кои треба да ги прави во секој случај.
- Имајте предвид дека не се сите деца исти. Откријте што е најдобро за вашето дете без да го споредувате со други.
- Уживајте заедно!
