Лицето на Мила Кунис доминира на корицата на августовското издание на списанието „W“. Холивудската ѕвезда која е бремена со првото дете беше фотографирана од Мајкл Томпсон.
Стилот од 60-тите години го диктираше концептот на фотосесијата за која Мила облече креации од модни куќи како Гучи, Ердем, Луј Витон и Александар МекКвин.
Во интервјуто за списанието, 30-годишната актерка зборувала за свршеникот Ештон Кучер и нивното минато. Парот се запозна на снимањето на серијата „That ’70s Show“ и долги години се движеше во зоната на пријателството.
„Мојот прв вистински бакнеж беше со него, во тоа шоу... Поминав низ пубертетот на телевизија. Пораснав 13cm додека бев во шоуто и имав многу различни форми на веѓите! Поминав низ сите засрамувачки нешта со кои една девојка може да се соочи пред очите на мојот свршеник. Нема сомнеж дека тој го има видено најлошото од мене. Тоа ме успокојува“ – изјавила Кунис.
Отсекогаш Мила била против бракот, но сега нејзиниот став е променет. „Никогаш не сакав да се мажам. Уште од 12-годишна возраст ги подготвував моите родители дека нема да дочекаат брак. Но, работите се менуваат – ја пронајдов љубовта на својот живот. Сега мојата теорија за свадба е: Не кани никого. Венчај се приватно и тајно. Моите родители немаат проблем со тоа. Превозбудени се што кажав да“ – објаснила таа.
Пред неколку недели Мила и Ештон беа фотографирани на бејзбол натпревар. И на двајцата ова ќе им биде прво дете.
