Пред десет години, на телевизиските екрани започнаа приказните на Серена ван дер Вудсен (Блејк Лајвли), Блер Волдорф (Лејтон Мистер), Чак Бас (Ед Вествик), Нејт Арчибалд (Чејс Крафорд), Ден Хамфри (Пен Баџли) и многу други ликови во серијата „Gossip Girl“.
Популарната серија за животот на привилегирани тинејџери од Менхетен привлекуваше со сплетките и пресвртите, но и со атрактивните модни комбинации.
Па, каде се и што прават ѕвездите една деценија по емитувањето на првата епизода?
Блејк Лајвли
Серена ван дер Вудсен
30-годишната ѕвезда сними неколку филмови („The Age of Adaline“, „Café Society“, „The Shallows“, „All I See Is You“), а во меѓувреме се омажи за актерот Рајан Рејнолдс и стана мајка на две ќерки - Инес и Џејмс.
Лејтон Мистер
Блер Волдорф
За разлика од Блејк, 31-годишната Лејтон поретко ја гледаме на холивудските свечености. „Блер Волдорф“ во вистинскиот живот е посветена на семејството - сопругот Адам Броди и ќеркичката Арло.
Покрај филмовите „The Judge“, „Life Partners“, „Like Sunday, Like Rain“ и „By the Gun“, таа сними и девет епизоди од „Making History“, но поради малубројната публика, серијата беше прекината.
Лејтон пред три години го издаде својот прв музички албум „Heartstrings“.
Ед Вествик
Чак Бас
По „Gossip Girl“, 30-годишниот актер и музичар ги сними филмовите „Romeo and Juliet“, „Bone in the Throat“, „Freaks of Nature“ и „Billionaire Ransom“. Негов најнов проект е серијата „White Gold“. Ед моментално е во врска со 26-годишната Џесика Серфети.
Пен Баџли
Ден Хамфри
Осаменото момче не е повеќе осамено. Пен на почетокот на годинава се ожени со Домино Кирк. Откако доби многу позитивни критики за филмот „Greetings from Tim Buckley“, 30-годишниот актер се посвети на музичката кариера. Моментално е фронтмен на неговиот бенд MOTHXR.
Чејс Крафорд
Нејт Арчибалд
32-годишниот актер доби улоги во филмовите „Mountain Men“, „Cry of Fear“, „Undrafted“, „Rules Don't Apply“, „Eloise“ и „I Do...Until I Don't“. Снимањето на неговата серија „Blood & Oil“ беше прекинато по само 10 епизоди. Крафорд е во врска со 28-годишната актерка Ребека Ритенхаус.
Тејлор Момсен
Џени Хамфри
Откако ја напушти серијата, 24-годишната актерка се посвети на музиката. За време на нејзините настапи со бендот The Pretty Reckless, Тејлор често е во провокативно издание.
Џесика Зор
Ванеса Абрамс
Џесика доби свои улоги во филмовите „I Don't Know How She Does It“, „The Internship“, и „Lucky in Love“. Наскоро ќе бидат емитувани новите епизоди од серијата „Shameless“, во кои глуми и Зор. Џесика е во врска со Скоти МекНајт.
