Сара Мејс твори од карантин преку Facebook Challenge и ја создаде песната „Наше време“.
Песната тргна како музички мотив на харфа, која таа го објави на својот профил за време на изолација и предизвика еден од нејзините колеги музичари да отсвири бас линија врз нејзината тема. Музичарите продолжија да се предизвикуваат и до крајот на денот тие стигнаа до дел од строфа која беше исто така објавена на Facebook.
Целосната песна ја имаме денес. Со неа и карантин видео - секој сниман во сосема домашни услови.
Сара Мејс преку песната испраќа силна порака: „Еден ден сѐ ќе биде во ред и времето кое го живееме сега, ќе биде раскажувано од нашите деца во иднина“.
Тимски создадена, музиката на „Наше време“ е на Сара Мејс, како и изведбата на харфа, вокали – Сара Мејс, Теона Јованоска и Матеј Додевски, Симеон Ангеловски – бас гитара, Драган Теодосиев – тапани, Зоран Јагоридовски – конги, додека за звукот се погрижи Ивица Јанкуловски.
