Приказна за медицинско чудо и голема сестринска љубов освојува срца ширум светот.
Жена од Шкотска го роди своето прво дете откако ѝ беше трансплантирана матка донирана од нејзината сестра и стана првата личност во Велика Британија која го има направено тоа.
Имено, Грејс и Ангус Дејвидсон ја добија ќеркичката Ејми во февруари, а убавата вест сега одекна насекаде.
Грејс отсекогаш сонувала да стане мајка, но тоа било невозможно бидејќи била родена без развиена матка поради ретка состојба (Mayer-Rokitansky-Küster-Hauser синдром). 36-годишната мајка е пресреќна што го доби своето „чудо“ и благодарна на својата сестра што одлучи несебично да го донира својот репродуктивен орган.
„Отсекогаш имав мајчински инстинкт. Години наназад ја потиснував желбата за мајчинство, бидејќи болеше премногу“ – открила Грејс.
За среќа, нејзината сестра Ејми Пурди во 2023 година одлучила да ѝ го подари најголемиот подарок – својата матка.
„Нашето семејство беше комплетно, па сакав и нејзиното да биде“ – изјавила Ејми, која е мајка на две деца. „Беше неверојатно, апсолутна радост. Вредеше секој момент“ – дополнила среќната тетка.
Бебенцето го добило своето име токму по сестрата на Грејс – Ејми. Девојчето го носи и средното име Изабел, во чест на докторката Изабел Кијрога, која ја предводела операцијата на трансплантација со времетраење од девет часа.
