Германскиот репрезентативец Месут Озил го продолжи својот хуманитарен поход во Бразил. Ѕвездата на Арсенал им ги плати неопходните операции на 11 деца од сиромашни семејства. Минатата година, тој на ист начин им го спаси животот на 23 дечиња.
Преку хуманитарната програма BigShoe, Озил им помага на сиромашните деца во Бразил, сакајќи да остави позитивен белег во земјата каде минатата година стана светски шампион како дел од германската репрезентација. „Дури и по една година откако го освоивме Светското првенство во фудбал, сакам да продолжам да оставам позитивен белег во Бразил преку финансирање на операциите на уште 11 деца. За мене е многу важно да продолжам да им пружам помош на децата од Бразил“ – стои во изјавата на Озил за официјалниот сајт на германската репрезентација.
Сите деца избрани за програмата потекнуваат од сиромашни семејства и не би можеле да добијат соодветен третман без помошта на Озил. Тие ќе бидат оперирани во периодот помеѓу 24 октомври и 7 ноември.
Ова не е првпат 26-годишниот фудбалер да спаси детски животи во оваа јужноамериканска земја. Во 2014 година, Озил го донираше целиот бонус од освојувањето на титулата на Мундијалот во Бразил за 23 дечиња да ги добијат неопходните операции. За својата хуманост, Месут се закити и со една од престижните „Лауреус“ награди.
