Нашите амбасадори на културата, танчарите од танцовото студио „Eat the beat“, го донесоа дома пехарот од неодамна одржаното Светско првенство во латино во Сараево, каде ја освоија престижната титула Светски шампиони во детска категорија.
Својата победничка кореографија тие имаа прилика да ја презентираат и пред претседателот на државата Стево Пендаровски и неговата сопруга Елизабета, кои ги посетија во нивното студио.
„Огромно е задоволството да си меѓу светски шампиони. Вечерва лично им честитав на членовите на танчерскоро студио 'Eat the beat' за успешното претставување на боите на својата земја и освоената прва награда во латино шоу во категорија деца. Ви посакувам уште многу успеси!“ - изјави Пендаровски.
„Покрај нив и останатите групи од 'Eat The Beat' учесници на светското првенство ги изиграа нивните кореографии. Децата, а и ние сме воодушевени и бескрајно благодарни“ - велат од „Eat the beat“.
По пауза од една година, малите, а големи таленти повторно ја освоија титулата Светски Шампиони во детска категорија.
Тие се членови на Македонската Асоцијација за Модерни Танци која реди успеси на светското првенство. Покрај Eat the Beat, Македонија ја претставуваат и танчерите на Expose од Битола. Досега двата клуба имаат 5 пласмани на пиедесталот, но во детска категорија повеќе од заслужено ја понесоа титулата светски шампиони, оставајќи ги Италија и Србија на второто, односно третото место.
