Најжешката ревија на светот го запали Њујорк. Секси долна облека, ангелски крилја украсени со кристали, дијаманти и пердуви, згодни манекенки, театрално дефилирање, музика со ритам кој примамува... шоуто на Victoria’s Secret е настан кој секој би посакал да му се одигра пред очи.
На екстравагантното шоу беа презентирани 65 фантастични костими и 28 волшебни ангелски крилја во рамките на пет секции: „Circus“, „Dangerous Liaisons“, „Calendar Girls“, „Pink Is Us“, „Silver Screen Angels“ и „Angels in Bloom“.
Шоуто го започна искусниот ангел Адријана Лима. Шармантната 31-годишна манекенка мамеше воздишки со костим инспириран од облеката на циркуските изведувачи. Кој би поверувал дека Адријана ја роди втората ќерка пред само два месеца?
Ревијата која ги претвора фантазиите во реалност ги искушуваше присутните да престанат да трепкаат. Повеќе костими имаа моќ да се врежат во сеќавањата на гледачите. Еден од нив беше градникот од фантазиите кој чини 2,5 милиони долари, а го носеше Алесандра Амбросио. Скапоцениот цветен градник е изработен од аметисти, сафири, рубини и дијаманти, а во центарот има бел дијамант од 20 карати. Костимот на Амбросио вклучува и колан декориран со 5.200 скапоцени камења и крилја кои потсетуваа на орхидеи.
На сцената зачекорија многу долгогодишни ангели и повеќе дебитантки меѓу кои: Миранда Кер, Кендис Сванапул, Ерин Хедертон, Дауцен Крус, Лили Олдриџ, Беати Принсло, Линдзи Елингтон, Карли Клос, Барбара Палвин, Кара Делавин, Камерон Расел, Џесика Харт и Хилари Рода.
За музичкиот дел на шоуто беа задолжени Ријана, Џастин Бибер и Бруно Марс. Ријана настапи со две нумери од својот најнов албум, „Diamonds“ и „Fresh Off the Runway“. Впечатливиот црн аутфит за момент ги оттргна погледите на присутните од ангелите и ги насочи кон популарната музичка ѕвезда.
Бруно Марс заигра пеејќи ги „Locked Out Of Heaven“ и „Lost“.
Џастин Бибер ги забавуваше ангелите со „Beauty and the Beat“ и „As Long As You Love Me“. „Ова е како остварување на сон“ – изјави тој.
