Селин Дион со сите сили се бори со страшните напади кои ги има поради синдромот на вкочанета личност.
56-годишната пејачка веќе извесен период јавно зборува за симптомите, а сега објави и видео во кое доживува серија на мускулни спазми и не може да мрда и да зборува.
Трогателната снимка е дел од документарниот филм кој Селин го снима за својот живот и борбата со болеста, а е насловен „I Am: Celine Dion“.
Дион вели дека дава сè од себе за да се избори со симптомите, бидејќи нејзините синови веќе изгубија еден родител.
„Едвај можев да одам во еден момент и моите деца го забележуваа тоа. Тие веќе изгубија еден родител, не сакав да бидат уплашени“ – изјавила Дион. Нејзиниот сопруг и татко на нејзините деца, Рене Анжелил, почина во 2016 година по долга битка со ракот.
Синдромот на вкочанета личност (Stiff Person Syndrome), кој ги претвора луѓето во живи статуи, е ретка невролошка болест со карактеристики на автоимуно заболување. Симптомите вклучуваат мускулни грчеви, неможност за наведнување, болка и хронична анксиозност. Мускулните грчеви можат да бидат толку силни што да доведат до изместување на зглобови и дури и кршење на коските. Пациентите може да завршат во количка или да бидат неподвижни, често не можат да работат и да се грижат за себе.
Нема лек за овој синдром, но постојат третмани кои помагаат за ублажување на симптомите.
