Новак Ѓоковиќ и Јелена Ристиќ ја крунисаа својата љубов со брак пред четири дена, а денес списанието „Hello“ ги објави официјалните фотографии од свадбената церемонија.
На фотографијата од корицата младенците не ја кријат својата среќа и Новак ја прегрнува својата сакана, поставувајќи ги дланките на нејзиното бремено стомаче.
За големиот ден Јелена избра венчаница од модната куќа Александар МекКвин, дизајнирана од Сара Бартон, креаторката која беше ангажирана и за венчаницата на војвотката Кетрин.
„Кога ја видов за првпат во нејзиниот невестински фустан, додека чекореше кон мене насмевната, таа изгледаше како ангел“ – рекол Новак во интервју за списанието.
Парот се венча на бајковитиот остров Свети Стефан во Црна Гора. „Со оглед на тоа дека и јас и Јелена многу сакаме море, лесно ја избравме идеалната локација. Црна Гора им е блиску на нашите семејства и на пријателите, а местото каде што се одржа венчавката навистина е магично. Баш како што си замислувавме. Преубава природа, море, шума...“ – рекол Новак.
„Се фокусирав на неа, на нејзината насмевка и на нашето бебе. Тоа навистина беше совршен момент... Се женам за жената која ја сакам и нема подобро чувство од тоа“ – додал тој.
Јелена, која е во шестиот месец од бременоста, била многу емотивна и пролеала и неколку солзи радосници. „Новак е прекрасен, многу емотивен, посветен, паметен и забавен. Започнавме да се забавуваме кога бевме многу млади, кога животот не ни беше ни приближно сличен на сегашниот. Но, ниту малку не се променивме, останавме оние исти Ноле и Јелена. Љубовта отсекогаш ни била на прво место и многу сум горда на ова што го имаме. Сите подеми и падови, сѐ е полесно кога сме заедно“ – рекла таа.
Свадбениот танц на идните родители започнал со „Because You Loved Me“ од Селин Дион.
Во текот на вечерта гостите имале можност да погледнат краток филм кој ја раскажувал љубовната приказна на парот.
