Сара Мишел Гелар го одбележа роденденот на Шенон Доерти, која почина во јули минатата година.
Ѕвездата од „Бафи, ловецот на вампири“ сподели фотографија и видео за да го одбележи овој важен ден, бидејќи до минатата година, двете пријателки заедно си ги прославувале родендените. Шенон, позната како Бренда од „Беверли Хилс 90210“ прославуваше на 12 април, додека роденденот на Сара е на 14 април.
„Уште откако паметам, заедно ги славевме нашите родендени Шенон Доерти. Оваа година ќе ја продолжам традицијата и ќе те славам тебе. Драго ми е што минатата година на овој ден бевме заедно, не знаејќи дека ќе биде за последен пат. Среќен роденден Шенон“ - напиша 48-годишната актерка.
Сара и во октомври минатата година имаше споделено фотографија со Шенон, но со цел да го одбележи Месецот за подигнување на свеста за ракот на дојка, болеста со која Доерти се бореше долги години пред смртта.
„Октомври е Месец за подигнување на свеста за ракот на дојка. Проверете се, донирајте или едноставно носете розово за да покажете поддршка. За жал, постојат големи шанси во моментов, некој во вашиот живот да страда од оваа срцепарателна болест“ – напиша таа.
Борбата со ракот на Шенон започна во 2015 година, кога ѝ беше дијагностициран инвазивен рак на дојка кој метастазирал барем на една лимфна жлезда. По бројни хемотерапии, губење на косата и енергијата, Шенон во април 2017 година сподели дека ракот бил во ремисија.
За жал, тоа не беше нејзино збогување со болеста. Во 2019 година, Доерти откри дека ракот на дојка повторно се врати, но овојпат беше во четврт стадиум.
Низ годините, Шенон споделуваше трогателни фотографии од губењето на косата и примањето на терапиите. На почетокот на минатата година, таа откри дека болеста се прошири и дека разви метастази на мозокот, а потоа ги зафати и нејзините коски. Таа почина во јули минатата година.
Шенон се прослави со улогата на Бренда Волш во серијата „Беверли Хилс 90210“, а подоцна и како Пру во серијата „Волшебнички“.
