Лејди Гага со најмногу награди на MTV EMA 2010

Вчера вечерта се одржа 17-тото по ред доделување на европските музички награди на MTV. Ева Лонгорија одлично се справи со улогата на водителка и за време на церемонијата успеа да се преслече дури 10 пати, а со секоја нова облека имаше и нова фризура.

Ева Лонгорија во улогата на водителка

Поп сензацијата Лејди Гага доби најмногу награди и тоа за Најдобар поп изведувач, Најдобар женски изведувач и Најдобра песна. Лејди Гага не ги прими лично наградите затоа што имаше настап во Будимпешта, но издвои време преку видео повик да им се обрати на своите обожаватели: „Жалам што не можам да бидам таму лично да ја примам наградата, но тука се 20 000 мали чудовишта кои ме чекаат, па морам да побрзам и да се вратам на сцената“.

Веднаш зад Гага се најде 16-годишниот Џастин Бибер. Тој доби две награди од кои едната за Најдобар машки изведувач, победувајќи ги Еминем, Ашер, Енрике Иглесијас и Кание Вест. И Бибер не присуствуваше лично да ја прими наградата, но ѝ се обрати на публиката преку сателит со зборовите: „Ова е неверојатно. Дури и не знам што да кажам. Мислам дека сите други изведувачи во оваа категорија ми се инспирација. Почестен сум да ја добијам оваа награда. Ова е големо постигнување“.

Еминем ја освои наградата за најдобар хип-хоп изведувач, а Кети Пери ја освои наградата за Најдобро видео за песната „California Gurls“.