Најновото издание на „Златна Бубамара на популарноста“ сосем очекувано помина со смеа, хумор, музички настапи, а сè разбира и со многу емоции.
За време на синоќешната манифестација, која се одржа под мотото „ДА СЕ ПРЕДАДЕМЕ на музика, забава и смеење!“, 28 награди им беа доделени на најуспешните за изминатата година.
Наградата за животно дело му беше врачена на композиторот Григор Копров, додека Мики Јовановски Џафер ја однесе дома Наградата за трајни музички вредности.
12-годишниот Марко Пејчиноски, кој и покрај здравстените проблеми минатата година го преплива Охридското езеро, ја доби наградата Спортски подвиг на годината. Перо Антиќ беше прогласен за Спортист легенда.
Влатко Лозаноски доби две награди – Пејач на годината и Хит на годината за песната „Јако Јако“.
Наградата Музичко откритие на годината беше резервирана за младиот бенд ДУПЕР, кој досега има снимено три авторски песни – „Не сум твој тип“, „Тело за на ТВ“ и „Ние сме 2“.
За Актерка на годината беше избрана Ирена Ристиќ, за ТВ актер на годината беше прогласен Горан Стојановски, додека наградата за Млад ТВ актер отиде во рацете на Дритон Вејсели, познат како Талат од серијата „Преспав“.
И Влатко Стефановски освои две награди. Едната за Албум на годината за „Мајчин јазик“, а другата за Концерт на годината.
Наградата Продуцент на годината му беше врачена на Лазар Цветковски, додека Група на годината стана Нокаут.
За Најпопуларен фото модел беше избрана Вера Мештеровиќ, која се појави на сцената во сина креација.
Целосната листа на наградени погледнете ја тука.
