Анџелина Џоли и Бред Пит минуваат низ тежок период. Златната двојка на Холивуд се разведува, а старателството над шесте деца привремено го доби Џоли.
Славните актери се договориле Медокс, Пакс, Захара, Шајло, Вивиен и Нокс одреден период да останат со нивната мајка. Пит ќе има право на посета на своите деца, но под услов средбите да бидат набљудувани од психотерапевт, кој подоцна ќе одлучи дали посетите и во иднина ќе се одвиваат под надзор.
Џоли поднесе документи за развод од Пит на 19 септември, а како причини за разделбата се наведуваат конфликти околу децата, злоупотреба на супстанции и проблеми со контролата на бесот. Наводно, Анџелина ја донела одлуката заради односот на Бред кон децата.
Во текот на изминатата недела, Пит доброволно се тестирал за дрога и алкохол, а резултатите од првите испитувања биле негативни.
52-годишниот актер и 41-годишната актерка беа во врска повеќе од една деценија. Тие се зближија за време на снимањето на филмот „Mr. & Mrs. Smith“. Својата љубов ја крунисаа со венчавка во Франција на 23 август 2014 година.
