Продуцентите на „American Crime Story“ најавија дека втората сезона ќе го проблематизира убиството на култниот дизајнер Џани Версаче. Имињата на актерите кои ќе се појават во серијалот се веќе познати: Пенелопе Круз ќе ја толкува улогата на Донатела Версаче, Едгар Рамирез ќе го гледаме како Џани Версаче, а Дарен Крис ќе го игра серискиот убиец Ендру Кунанан. Во споредните улоги ќе се појават Рики Мартин, како долгогодишниот партнер на Џани, Антонио Д’Амичо и Макс Гринфилд, како постариот брат на Џани, Санто Версаче.
Пенелопе Круз како Донатела Версаче
Едгар Рамирез како Џани Версаче
Дарен Крис како Ендру Кунанан
Рики Мартин како Антонио Д'Амиче
Премиерата на серијалот насловен како „American Crime Story: The Assassination of Gianni Versace“ ја очекуваме во 2018 година. Продуцентот Рајан Марфи откри дека дел од сцените ќе се снимаат токму во вилата во Мајами, каде што Џани беше убиен во 1997 година.
Пенелопе Круз откри дека имала долг разговор со Донатела Версаче, пред да ја прифати улогата и да потпише договор. На шпанската актерка ѝ било премногу важно да добие благослов од Донатела за да се согласи да ја портретира во серијалот. „Се надевам дека ќе биде среќна кога ќе ја гледа серијата. Сигурна сум дека некои сцени ќе ѝ бидат тешки за гледање бидејќи ја прикажуваат загубата на нејзиниот брат, за што, се разбира, имам голема почит. Го направив тоа со сета моја љубов“ - изјави Пенелопе за Донатела по снимањето на првите сцени.
„Соработував со инструктор за го пронајдам начинот на кој Донатела зборува бидејќи нејзиниот говор сега се разликува од оној во 90-тите. Нејзиниот акцент е италијански, со интернационални примеси, што е навистина рокенрол. Не сакав да направам имитација на Донатела, ниту, пак, карикатура. Сакав да се обидам да го дофатам она што е суштествено за неа. Ова е деликатна приказна бидејќи играм некој што е сѐ уште жив, некој кој го изгубил својот брат на ужасен начин и кому тој сѐ уште му недостига, дури и по 20 години“- изјави Пенелопе Круз за списанието „Interview“.
