Јелена Томашевиќ пристигна во Битола. 36-годишната српска пејачка утре ќе одржи свој концерт заедно со Камерниот Оркестар на Битола во рамките на „Фестивалот на музика од светот“.
Пред да запее на сцената во Центарот за култура, Јелена објави фотогафија на која позира на Широк Сокак. Во описот таа напиша: „Ако одам во Битола, ќе прошетам по Широк сокак“.
Талентираната музичка ѕвезда објави и видео од пробата и ѝ се заблагодари на публиката за љубовта. „Од Центарот за култура Битола ми кажаа дека концертот се распродаде за неколку часа. Ви благодарам до небото за љубовта, ќе ви возвратам на концертот во сабота“ – напиша таа.
Во Битола пристигна и финската хармоникашка Хели Сиекинен, чиј концерт ќе се одржи денес.
Двете музичарки заедно со директорката на Центарот за култура, Маја Андоновска Илијевски, засадија свои дрвца.
Јелена Томашевиќ изјави дека пред 10 години засадила дрво во Крагуевац, а многу се радува што второто е во Битола. Хели Сиекинен верува дека зеленилото е најважно за чиста животна средина.
Третиот ден од Фестивалот е резервиран за концертот на оркестарот „Џамбо Агушеви“.
