Фотографиите на Дајен Јуделсен ќе ви го скршат срцето и ќе ви ја покажат издржливоста, силата и храброста на една жена. Тие се спомен од единаесетте бебиња кои таа ги изгубила поради спонтани абортуси во текот на 12 години.
57-годишната фотографка го создала моќниот фотосеријал „Lost“ за да им покаже на жените кои изгубиле бебе дека не се сами и поттикна многу од нив гласно да зборуваат за своите искуства со спонтаниот абортус.
Од бебешко боди со игла за везење, до сплетена бебешка облека – секоја фотографија вклучува снимка од ултразвук, името на бебето и предмети кои ја потсетуваат Дајен на секое бебе зачнато во неа.
„Чувам спомени од секое од моите 11 изгубени бебиња. Сите тие се уредно спакувани во бела кутија во мојот плакар, како што сите тие спомени од нивните кратки животи се уредно спакувани во моето срце“ – пишува таа на својот сајт.
„Се надевам дека со споделувањето на овие фотографии ќе допрам до животите на бројни жени кои ја искусиле или ја искусуваат болната загуба на бебе. Тие не се сами во нивното патување“ – продолжува таа.
Јуделсен се охрабрила да го создаде фотосеријалот откако ѝ помогнала на пријателка да се справи со болката по спонтан абортус. „Тоа ме поттикна да ја земам големата бела кутија од плакарот, која ги пази спомените од моите изгубени бебиња. Помина доста време откако за последен пат ги извадив предметите од неа и како што ги редев на креветот, почувствував дека нивната приказна треба да биде документирана“ – објаснува Дајен.
Иако Јуделсен и сопругот имаат две деца, болката од 11-те изгубени бебиња никогаш не престанала. Сепак, таа признава дека споделувањето на фотографиите значително ѝ помогнале да си ја намали тагата.
„Велат дека кога даваш и добиваш. Според мене ова е вистина, особено доколку даваш од срце. Помагајќи им на другите да ја излечат емоционалната болка од прекинувањето на бременоста, јас си ја намалив сопствената“ – вели Дајен.
Спонтаниот абортус е многу честа појава, но луѓето ретко зборуваат за него. Целта на Јуделсен е да го промени тоа.
