Џефри Кендал стана интернет сензација откако ја намали својата тежина за 31 килограм. По трансформацијата тој објави фотографии од новиот изглед, а многумина го споредија со Дизни принц. Сега неговата цел е да стане модел и актер.
Целиот свој живот, 26-годишниот Американец имал проблеми со тежината, а страдал и од депресија и ниска самодоверба. Дополнително, тој бил принуден да се грижи за својата болна мајка откако таа добила повреда на мозокот.
„Таа беше во кома и на рехабилитација во болница седум месеци пред да биде испратена дома поради прекин на здравственото осигурување. Првиот ден кога се врати дома, не ме препозна. Тоа беше многу емотивен период за мене. Кога ја гледав како зјапа во мене без оној копнеж на мајка, срцето ми се кинеше. Тоа ми донесе болка и самосожалување“ – пишува тој.
Грижливиот младич започнал да вежба заедно со свој пријател за да го мотивира да се врати во форма по неговото раскинување со девојката. Како што слабеел, така неговата мајка сè повеќе го препознавала, што го мотивирало да продолжи да тренира и да се храни здраво.
„Како што ја намалував тежината, таа започна да ме препознава повеќе и повеќе и многу сум благодарен што повторно ја видов таа искра во нејзините очи. Среќата ми се зголеми, како и самодовербата. Започнав да вежбам јога и да тренирам речиси секој ден“ – објаснил тој.
За да си ја зголеми самодовербата уште повеќе, Џефри започнал да објавува фотографии од својот напредок на социјалните мрежи и бил преплавен со позитивност. Бројни беа коментарите во кои тој е споредуван со човечка верзија на Ѕверот од „Убавицата и Ѕверот“.
„Бев избезумен од позитивноста. Тоа направи да сакам да се грижам за себе уште повеќе, да вложам повеќе енергија во себеси. Коментарите беа инспиративни. Многумина ме нарекуваа вистински Дизни принц, што ми беше најголем комплимент“ – вели тој за огромната поддршка на социјалните мрежи.
„Тоа што сум дома за да ѝ помагам на мајка ми исто така ме мотивира. Таа е најсилната личност што ја познавам и постојано ме тера да го ценам животот. На крајот од денот, само сакам да ја направам горда. Сега сум 31 килограм полесен и го ценам секој здив. Ја користам љубовта и поддршката од сите околу мене за да продолжам да се стремам кон мојата ултимативна цел во животот“ – додава инспиративниот маж.
