Фотографиите на Кели Ни ќе ве исполнат со емоции и ќе ви ја покажат моќта на женското тело.
На нив, грижливата мајка го дои своето новороденче со една града, бидејќи другата ѝ била отстранета како последица на рак на дојка. Малото бебенце ѝ е петто дете на Кели.
Во текст на својот блог со наслов „Едната града се обиде да ме убие, другата го одржува моето бебе живо“, 36-годишната жена раскажува дека и покрај сите предизвици е благодарна што добила можност да негува уште еден живот.
Две години пред породувањето на Кели ѝ била отстранета едната града поради рак и таа морала да помине низ третмани со хемотерапија. Веста за бременоста по борбата со ракот ѝ била најголемата награда, која ѝ помогнала да излезе од канџите на анксиозноста и депресијата и конечно да го прифати своето тело.
„Сфатив дека нема од што да се срамам. Имав рак, мојата града се обиде да ме убие, но сега мојата друга града храни и придонесува за животот на друго човечко суштество. Имам врска на љубов и омраза со моите гради. Мразам што тие се обидоа да ме убијат, но го сакам тоа што можам да го хранам моето бебе. На моите деца не им е гајле што имам само една града, не им е гајле за мојот изглед, не им е гајле дека моите гради имаат лузни. Но, важен им е фактот што сум жива, што сум способна да им овозможам храна и што се премногу сакани“ – пишува таа.
„Научив дека среќата не завршува, треба само да ѝ дадете време и таа ќе се случи повторно... или барем тоа беше така кај мене“ – додава Кели.
