Катастрофалните поплави кои го зафатија Балканот ја разбудија хуманоста кај милиони лица кои несебично донираат храна, облека, лекови и средства за хигиена. Илјадници доброволци се упатуваат кон критичните места во Србија и Босна и Херцеговина за да помогнат при евакуацијата на населението и поставувањето на заштитни насипи.
Македонските граѓани непрекинато учествуваат во сѐ побројните хуманитарни акции кои се организираат низ целата држава. Црвениот Крст соопшти дека заклучно до 12 часот денеска, преку телефонските броеви за донација биле собрани 7.300.000 денари.
Со повик на телефоните 070/077/075 143 400 секој може да донира по 100 денари. Финансиските средства ќе бидат уплатени на сметките за помош на Србија и Босна и Херцеговина на 31.05.2014.
Црвен Крст на Република Македонија
Низа културни настани, концерти и претстави во следниот период ќе бидат од хуманитарен карактер. Голем хуманитарен концерт ќе биде одржан в четврток во 19 часот во салата „Борис Трајковски“. Министерката за култура Елизабета Канческа Милевска соопшти дека на концертот ќе настапат голем број македонски ѕвезди. Картите чинат 150 денари.
И учесниците на музичкото шоу „X Factor Adria“ на 7 јуни ќе пеат во Скопје за помош за жртвите на големите поплави.
Издвојте малку од своето време, информирајте се како може да помогнете и покажете ја својата хуманост. Еден повик на телефоните за донации е најмалку што можете да направите.
