Д-р Хаџи-Лега
Скречингот или ендометријалното загребување претставува метода која што може да се изведе на два начина. Со киретажа, загребување на ендометриумот на матката со инструмент, односно едноставно се загребува слузницата на матката и се отстранува дел од неа, со што се постигнува пролиферација на крвните садови на самата матка и на ендометриумот и со тоа подобро снабдување на матката и ендометриумот со крв и следствено на тоа, полесна имплантација и забременување на пациентката.
Втората метода е да се изведе таа интервенција хистероскопски, т.е. со камера се влегува во матката. Трансвагинално ја гледаме слузницата на матката и директно се загребува, што значи методот е пак ист. Повторно се загребува ендометриумот, со што се смета дека се постигнува една подобра циркулација на ендометриумот на матката и на самата матка. На тој начин ја подготвуваме матката, за со наредната стимулација или со наредното враќање на ембриони тој ендометриум да биде поквалитетен и на некој начин да го прифати ембрионот, за пациентката да остане трудна.
Треба да се спомене дека самата метода на скречинг по некои протоколи не е препорачлива во секој циклус, туку најчесто се препорачува кај пациенти коишто два или повеќе пати прават ин витро, односно ако не останат трудни, тогаш се препорачува да се примени оваа метода.
Д-р Хаџи-Лега
Од мое лично искуство, можам да кажам дека еве во изминатата година, можеби 7-8 пациентки кои што имале неколку последователни неуспешни ин витра, по скречингот останаа трудни и мислам дека навистина има ефект таа метода. Но, како што рековме, по 1, 2 или 3 обиди доколку не дојде до забременување, тогаш ја применуваме. Не априори дека со секое ин витро треба да се прави скречинг.
За тој скречинг имаме тајминг – се прави на 20 или 21 ден од претходниот циклус кога планираме да правиме ин витро или во тек на самиот циклус кога се планира да се прави ин витро на 3 или 4 ден од циклусот. Тоа го правиме во договор со пациентите. Од мое лично искуство, јас го правам пред пациентката да добие менструација, 21 или 22 ден.
Д-р Маќули Хаџи-Лега
Гинеколог-акушер и ИВФ специјалист
„Њуборн Клиника“
