Најсексапилната ревија на светот заведува со неповторлив спој на театрални костими и долгоноги оскудно облечени манекенки.
На њујоршкото шоу на Victoria’s Secret синоќа дефилираа 40 модели во 67 спектакуларни костими. Драматичниот изглед на згодните убавици беше надополнет од 28 пара ангелски крила украсени со пердуви и кристали.
Ревијата беше сочинета од шест возбудливи сегмента. Британската култура беше инспирација за „British Invasion“, колоритниот изглед на егзотичните птици вдахна живост во костимите од „Birds of Paradise“, преживеани убавици по бродолом го исполнија сегментот „Shipwrecked“, забавни костими испреплетени со весел дух и позитивност завладеаја во „Pink Network“, романтиката, мистичноста и гламурот на Париз го дефинираа „Parisian Nights“, додека кристалната белина на снежната зима ги роди идеите за „Snow Angels“.
Екстравагантните обувки доаѓаат од фантазијата на дизајнерот Николас Кирквуд, а просечната висина на потпетиците е 15 сантиметри.
Грандиозното шоу започна со најлуксузната креација – градникот од 10 милиони долари. Кендис Сванапул занесно се движеше по светкавата писта во „Royal Fantasy Bra“, изработен од 18-каратно злато и декориран со повеќе од 4.200 скапоцени камења, меѓу кои има рубини, дијаманти и жолти сафири. Во центарот на градникот блескаше 52-каратен рубин во форма на круша. Белите ракавици го дополнија кралскиот изглед на 25-годишниот ангел.
Публиката беше шармирана од мала армија светски познати манекенки, меѓу кои Адријана Лима, Алесандра Амбросио, Кендис Сванапул, Ерин Хедертон, Лили Олдриџ, Кара Делавин, Беати Принсло, Линдзи Елингсон, Џесика Харт, Карли Клос, Тони Гарн, Џоан Смолс, Сара Сампајо, Хилари Рода и Магдалена Фраковјак.
Музиката им беше препуштена на Тејлор Свифт и бендовите Fall Out Boy, A Great Big World и Neon Jungle.
