Младешки дух и естетиката на 90-тите, нескротливата човечка природа и безвременската убавина на црната боја ги поставија темелите на колекциите на Jar & Jam, Мила Спасовска и Зана Алиу кои беа презентирани во рамките на вториот ден на Моден викенд Скопје.
Зана Алиу
Зана Алиу покажа „зошто црната боја е совршена хармонија на елегантното“.
Според дизајнерката, таа е царица на општеството; толку едноставна и толку комплицирана; таа е тивка и скромна, но истовремено и арогантна, бурно изразувајќи ја страста, мистеријата, љубовта, сексапилноста.
Jar & Jam
Бугарскиот современ и алтернативен бренд Jar & Jam освојува со облека во нијанси на бонбони и мами урбани девојки со младешки стил.
Колекцијата „Tempo & Patience... Sweet temptation“ неодоливо го оживува духот на 90-тите години од минатиот век.
Yamuna на Мила Спасовска
Првите чекори на домашната сцена ги направи Мила Спасовска под етикетата Yamuna, дебитирајќи со самостојната колекција „Текстура на умот“, која дефинира стихија на сопственото јас.
Во белешките за колекцијата стои: „Ни ја подарува убавината која стои зад внатрешната војна. Го гледаме човекот како си игра со временските непогоди и како чекори низ нив. Го гледаме човекот како е подготвен за секоја непогода, а воопшто не е подготвен за блаженство. Внатрешната наспроти надворешната борба и вечното тежнеење кон сопствена револуција.“
Фото: Филип Вирановски / Femina.mk
