Скопје три дена ќе пулсира во ритамот на модата. Под слоганот „Десет години заедно – приказната продолжува“, синоќа започна Моден викенд Скопје.
Ирина Тошева
Планираната низа од ревии ја започна Ирина Тошева со колекцијата „REM“, чиј појдовен мотив е ликовното творештво и надреализмот. Изработката е со еколошки материјали од банана и пченка, како алтернатива за памукот. Станува збор за еден од поддржаните проекти од национален интерес за 2019 година од Министерството за култура.
Во соработка со шминкерот Небојша Пешевски, Schuster, La Dama и D'eyeko, Тошева ги презентираше своите креации со модели налик на дрег кралици.
Кренаре Ругова
Необични силуети кои говорат за изразена индивидуалност доминираа на ревијата на Кренаре Ругова.
Гостинката од Косово ја создаде новата колекција со идејата модерната жена да се чувствува силно и комфорно.
SIGMA Jewelry
Префинети модни додатоци блескаа на моделите во Музеј на град Скопје. Викторија Лоба, како заштитно лице на брендот, ја отвори презентацијата.
Следуваше модниот филм и перформансот „+7 HOURS“, во реализација на наградуваната платформа за концептуален дизајн ИВАН АСЕН 22 од Софија, под водство на кураторот Нели Митева. Во прашање е проект што има за цел да ги вкрсти бугарската и јапонската култура низ јазикот на визуелното.
Финалниот резултат се екстравагантни креации, заеднички создадени од девет модни дизајнери од Бугарија, како и четири студенти по моден дизајн од Јапонија. Седум часа всушност е времето кое ги „дели“ како разлика овие две земји. Главната улога во истоимениот филм што го придружува перформансот ја толкува актерката Ирмена Чичикова. Го истражува феноменот за современиот урбан живот, пресликан во футуристички варијанти на традиционалните кимона и носии.
Освен модата и дизајнот, посетителите во Музејот на град Скопје, подеднакво уживаа и во музичката програма. Пред и после секоја одржана ревија, можеше да се слушнат изведбите на Јон Бела и бендот Moonage. Петочната забава по нивното завршување продолжи со звуците на познатиот ди-џеј Flooder.
За маркантната шминка на манекенките се заслужни брендот Kryolan и визажистите од школата за убавина Art, додека занимливите фризури беа направени со производите од брендот Revlon Professional, како и вештите раце на докажаните професионалци од Bube Studio In.
Фото: Филип Вирановски / Femina.mk
