Бајковити крилја + сексапилни костими + театрални детали + ангели и модели со занесни фигури... тоа е успешната формула за спектакуларно шоу на Victoria's Secret.
Синоќешната ревија која се одржа во Њујорк беше поделена во неколку сегменти, а за првпат беше претставена и колоритната капсулна колекција која е резултат на модната соработка на VS со грчката дизајнерка Мери Катранцу. „Glam Royalе“, „Downtown Angels“, „Pink“, „Celestial Angels“, „Golden Girls“ и „Flights of Fantasy“ беа темите кои ги диктираа магичните костими.
Фановите на популарниот бренд ќе се сеќаваат на овогодишната ревија со голема возбуда, но и со доза тага поради „пензионирањето“ на Адријана Лима. Ангелот со најдолг стаж со солзи во очите се збогува со своите крилја.
Кендис Сванапул и Беати Принсло, кои годинава ги родија своите втори деца, се вратија во атрактивната армија модели во која беа и Сара Сампајо, Роми Страјд, Елза Хоск, Вини Харлоу, Кендал Џенер, Џиџи и Бела Хадид, Тони Гарн, Барбара Палвин, Џасмин Тукс, Шанина Шајк, Даки Тот, Лаис Рибеиро, Стела Максвел, Жозефин Скривер, Тејлор Хил и Кели Гејл.
Најскапата креација годинава ја носеше Елза Хоск. Блескавиот „градник од фантазиите“ е декориран со 2.100 сваровски дијаманти и чини еден милион долари.
За музичкиот дел на шоуто беа задолжени Рита Ора, Холзи, Шон Мендес, Биби Рекса, Келси Балерини, Лајла Џејмс, The Struts и The Chainsmokers.
