Ѕвездата од „Prison Break“ со емотивен пост возврати на меме кое ја исмејува неговата тежина

Денес открив дека сум тема на интернет меме. Тоа не е првпат.

Но ова, се истакнува од другите.

Во 2010 година, бев полу-пензиониран од актерството и избегнував публицитет поради повеќе причини.

Прво и најважно имав самоубиствени мисли.

Тоа е тема за која оттогаш имам многупати пишувано, зборувано и споделувано.

Но, во тоа време, страдав молчаливо. Како што е случај со многу други. Малкумина знаат колку многу се измачував.

Засрамен и во болка, се сметав себеси за безвреден. Гласовите во мојата глава ме туркаа на патот до самоуништување. Тоа не се случуваше првпат.

Се борам со депресија уште од дете. Тоа е борба која ме кошта време, можности, врски и илјадници непреспани ноќи.

Во 2010 година, бев во најлошиот период во мојот живот како возрасен и секаде барав олеснување/утеха/одвлекување на вниманието. И се насочив кон храната. Можеше да биде што било – дрога, алкохол, секс. Но, јадењето стана она едно нешто кое го чекав со нетрпение. Имаше периоди кога најубавиот момент во седмицата ми беше омилениот оброк и нова епизода на Top Chef. Понекогаш тоа беше доволно. Мораше да биде така.

И се здебелив. Голема работа.

Еден ден, додека пешачев со пријател во Лос Анџелес, ни се пресекоа патиштата со филмска екипа која снимаше реално шоу. Без да знам, папараците кружеа. Ме фотографираа, а фотографиите беа објавени до мои слики од друго време во мојата кариера.

Мајка ми има од оние „пријатели“ кои секогаш први ти ги соопштуваат лошите вести. Отсекоа една од тие статии од популарен национален магазин и ѝ ја испратија по e-mail. Таа ми се јави загрижена.

Во 2010 година, додека се борев за моето ментално здравје, тоа беше последното нешто што ми требаше.

Да не должам, преживеав.

Преживеаја и тие слики.

Мило ми е за тоа.

Сега кога ќе ја видам таа фотографија од себе во црвена маица и со ретка насмевка на лицето, се потсетувам на мојата борба. На мојата издржливост и упорност додека се соочував со најразлични демони. Некои внатрешни. Некои надворешни.

Како глуварче кои се пробива низ тротоарот, јас опстојувам.

Некако. Сè уште. И покрај сè.

Кога првпат го видов тоа меме на социјалните мрежи, морам да признам дека тешко ми беше да дишам. Тоа што зборувам за ова/мојата слика значи Сила. Заздравување. Простување.

Себеси и на другите.

Ако ти или некој што го познаваш се мачи, достапна е помош. Побарајте. Пратете порака. Пратете e-mail. Кренете телефон. Некој се грижи. Тие чекаат да ве слушнат. Многу љубов. В.М.