Синоќа, музичкиот свет се обедини во „Стејплс центарот“ во Лос Анџелес за да ја проследи манифестацијата Греми 2019. На престижниот музички настан беа наградувани најдобрите во музичката индустрија за годината која измина.
61-вото издание на Греми го водеше Алиша Кис.
Доналд Гловер, кој на музичката сцена настапува под името Чајлдиш Гамбино, беше голем победник на вечерта. Во негови раце завршија четири награди, меѓу кои и посакуваните – Запис на годината и Песна на годината за „This Is America“,
Лејди Гага ја напушти манифестацијата со три златни грамофони и со доминација во категориите посветени на поп музиката. Ѕвездата од филмот „A Star Is Born“ и нејзиниот колега Бредли Купер победија во категориите Најдобра поп изведба на дуо или група и Најдобра песна напишана за филм за „Shallow“. Лејди Гага победи и во категоријата Најдобра соло изведбаза „ Joanne (Where Do You Think You’re Goin’?)“.
На Кејси Масгрејвс ѝ беше доделена статуетка за Најдобар албум за „Golden Hour“. 30-годишната музичарка доминираше и во сегментот посветен на кантри музиката, освојувајќи награди за Најдобра соло кантри изведба и Најдобар кантри албум.
Дуа Липа го присвои златниот грамофон во категоријата Најдобар нов артист, а нејзината песна „Electricity“ со Silk City беше прогласена за Најдобар денс запис.
Карди Би се запиша во историјата како првата жена која добила Греми во категоријата Најдобар рап албум. Таа чест ѝ припадна благодарение на албумот „Invasion Of Privacy“.
Целосната листа на номинирани и добитници на Греми можете да ја погледнете тука.
