Луисана Лопилато и Мајкл Бубле го прославија 11-тиот роденден на синот Ноа.
37-годишната ѕвезда од „Млади бунтовници“ сподели видео со кадри од прегледот со ултразвук на 17 мај 2013 година додека беше бремена со Ноа, па сè до денес, кога тој е големо момче кое свири на пијано. Низ видеото, Ноа неколкупати е сниман како учи да свири, следејќи го музичкиот пример на својот татко.
„Среќен роденден, Ноа љубов моја!!! Ти беше тој кој нè научи како да бидеме родители, кој ми го зароби срцето со тие длабоки сини очи и ме исполни со љубов од првиот момент. Те сакам со целото мое срце. Ти благодарам што си толку уникатен, што нè избра како твоја фамилија, за твоите бакнежи и прегратки, за твоите ноќни приказни и за твојата прекрасна музика што ја споделуваш со нас. Ти си дарот на нашите животи, се гордеам со тебе! Мојот вистински суперхерој засекогаш“ – напиша таа.
Во ноември 2016 година, кога Ноа имаше неполни 3 години, му беше дијагностициран рак на црниот дроб. Тој се лекуваше во САД и за среќа, ја победи болеста.
Луисана и Мајкл имаат уште три други деца.
