Црната боја владееше на црвениот тепих на „Златен глобус“. Со исклучок на неколку гостинки, сите дами носеа црни креации во знак на протест против сексуалното малтретирање и во знак на солидарност со оние кои биле злоупотребени и оние кои собраа храброст да проговорат.
Ѕвездите ја покажаа својата поддршка на движењата #MeToo и #TimesUp избирајќи црна облека, а осум актерки на популарната свеченост беа придружувани од активистки.
Движењето „Time’s Up“ помогна досега да се соберат речиси 16 милиони долари наменети за правна поддршка на жени и мажи кои биле сексуално малтретирани, злоупотребени или нападнати на работното место.
„Сакавме да се исправиме и да направиме нешто за сите луѓе, да речеме дека истече времето на дискриминацијата, малтретирањето и злоупотребата на работното место“ – рече Рис Витерспун.
„Вечерва не е момент, туку движење“ – порача Ева Лонгорија.
„Посветени сме да направиме промена не само во нашата индустрија, туку во секоја индустрија“ – изјави Кери Вашингтон.
Во изминатите месеци излезе на виделина дека многу холивудски моќници ја користеле својата позиција за да изнудуваат секс, да малтретираат, па дури и да силуваат. Сè започна со разоткривањето на Харви Вајнстин како сексуален манијак кој злоупотребил десетици актерки, но потоа на листата се најдоа и повеќе други мажи меѓу кои Кевин Спејси, Брет Ратнер, Луис Си Кеј и Ед Вествик.
За кратко време, движењето #MeToo го обиколи светот. Многу жени како Лејди Гага, Елен Деџенерис, Рис Витерспун, Емили Ратајковски и Бјорк го искористија хаштагот за да споделат дека биле малтретирани.
Алиса Милано ја популаризира фразата „Me Too“, која вирално се прошири низ над 80 држави во светот. „Ако сите жени кои биле сексуално малтретирани или нападнати напишат ‘и јас’ како статус, можеби ќе им дадеме на луѓето претстава за сериозноста на проблемот“ – напиша таа на Twitter.
