Виталиј Седјук е познат натрапник на црвениот тепих, но неговите „шеги“ често се невкусни.
Новата жртва на прочуениот Украинец беше Ким Кардашијан. Додека телевизиската ѕвезда излегуваше од автомобилот, Виталиј ја нападна и се обиде да ја повлече на земја, но беше оттргнат од телохранителите.
Ким, Кание Вест и Крис Џенер се упатуваа на ревијата на Balmain во Париз кога Виталиј одлучи да се „пошегува“.
Подоцна Виталиј призна дека го предизвикал инцидентот. „Се надевам дека Ким е ОК и дека нема да ми биде лута, бидејќи немав намера да ја повредам. Кание е многу среќен маж затоа што Ким е божица!“ – изјавил Виталиј за E! News.
Ова не е првпат Виталиј физички да нападне славна личност. Во мај годинава тој го нападна Бред Пит на премиерата на „Maleficent“ и заврши на суд. Тогаш му беше забрането да присуствува на каква било холивудска свеченост. Наводно, нападот на Ким бил негов протест за пресудата.
За време на Канскиот филмски фестивал Виталиј се пикна под фустанот на Америка Ферера.
Тоа се само две од неговите „шеги“ со холивудските ѕвезди.
Во февруари Виталиј му се нафрли на Леонардо Дикаприо и цврсто му ги прегрнуваше нозете додека не беше отстранет од црвениот тепих од обезбедувањето.
Претходно „жртва“ на Виталиј беше и Бредли Купер.
Во мај 2012 година, на премиерата на „Men in Black 3“ во Москва, Виталиј се обиде да го бакне Вил Смит в уста. Очигледно изнервиран од таквата постапка, Вил го турна премногу нападниот новинар и го плесна по образ пред камерите.
