Модната парада на 86-тото издание на престижната манифестација Оскар донесе микс од гламур, елеганција и умерен сексапил. Иако на црвениот тепих отсуствуваше експериментаторски дух и драматичност, имаше доволно дизајнерски креации кои го задржуваа погледот. Дури и Лејди Гага, која се прослави со ексцентричниот стил на облекување, имаше избрано нежна вечерна тоалета од Версаче и едноставна шминка и фризура.
Нежните бежови и светло розови нијанси доминираа низ женствените креации, но не беа изоставени класичната црна и кралската сина боја.
Откако светот ја запозна Лупита Нионго, се заљуби во неа, а нејзиниот стил досега вешто ги избегнува негативните критики. Талентираната актерка од „12 Years a Slave“ изгледаше како модерна Пепелашка во светло син фустан од модната куќа Прада.
Три трудници ги однесоа своите неродени бебиња на најгламурозната ноќ во Холивуд. Оливија Вајлд го сокри трудничкото стомаче под црн фустан од Валентино, Кери Вашингтон шармираше во едноставна креација на Џејсон Ву, додека Елза Петаки, која очекува близначиња, носеше блескав фустан од Ели Сааб.
Немаше изненадувања кај Шарлиз Терон и Џенифер Лоренс кои ѝ останаа верни на француската модна куќа Кристијан Диор. Кејт Бланшет, која се закити со Оскар, носеше бежов фустан со апликации од Армани, додека Пенелопе Круз за големата вечер избра асиметричен фустан од Џамбатиста Вали.
