Луѓето отсекогаш се обидувале да најдат начин да си го продолжат животот. И благодарение на науката и различните истражувања, животниот век на човекот бавно, но сигурно се зголемува.
За долг живот важни се среќата и социјалните контакти.
Со цел да откријат која е тајната на долгиот живот, истражувачи од Сиднеј испрашувале 188 мажи и жени кои имале барем 100 години. Еве некои од нивните заклучоци:
- Само двајца од учесниците биле пушачи, иако 28% признале дека се бивши пушачи.
- Скоро сите учесници консумирале алкохол, но во умерени количини.
- Голем дел биле сè уште физички активни, а 60% од нив секојдневно оделе на прошетка или правеле одредени вежби.
- Најголем дел од учесниците се опишале себе си како оптимисти и екстравертни личности.
- Сите биле во стабилни односи со семејството. 88% имале контакт со членови на семејството еднаш или двапати неделно, а 26% секојдневно контактирале со своето семејство.
- 76% од нив редовно учествувале во некакви групни активности, со пријатели или членови на семејството.
Професорот Робин Ричмонд, кој го предводел истражувањето, изјавил дека гените влијаат само со 20-30% врз шансите човек да живее до 100 години. Тоа значи дека карактерот и начинот на живот се клучни за долг живот.
Има и една добра вест за жените од ова истражување: било откриено дека жените непушачи имаат најголеми шанси да доживеат 100 години. Само секој четврти од 188-те луѓе над 100 години бил маж.
