Мажите повеќе зборуваат за фудбал отколку за жени

Денес е финалето на Лигата на шампионите, а преку летото нè очекува Светското првенство во фудбал. Токму овие големи настани во светот на спортот им даваат повод на мажите да зборуваат што повеќе на нивната омилена тема – фудбалот.

А знаевте ли дека мажите сакаат да зборуваат за фудбал многу повеќе отколку за жени, т.е. дека тоа им е најомилената тема на разговор?

Познатиот бренд за пиво Heineken спроведе меѓународно истражување за машките навики поврзани со фудбалот. Учествувале 5 300 мажи на возраст од 25 до 40 години.

Според анкетата, фудбал најмногу гледаат Англичаните. Просечниот Англичанец гледа фудбал 2 часа и 22 минути неделно, а дискутира за резултатите дополнителни 3 часа и 21 минута.

Дури 88% од учесниците изјавиле дека фудбалот им е омилена тема на разговор кога се излезени со пријателите на пиво. Така, разговорите за жените започнуваат дури откако ќе се исцрпат разговорите за фудбалот, затоа што тоа им е втора омилена тема.

Кинезите му придаваат уште поголема важност на фудбалот. Цели 94% од Кинезите сметаат дека фудбалот заслужува најголемо внимание. Русите не заостануваат многу зад нив со 93%.

Германците и Французите разговорите за жените ги поставиле на трето место. Тие повеќе би разговарале за работата, отколку за жените.