Преслатко момче со Даунов синдром е ѕвездата на кампања на Amazon.
Малиот Рио освои многу срца кога пред неколку месеци беше еден од моделите на Primark, а сега го прави истото како дел од кампањата Amazon Smile, која им овозможува на купувачите да донираат во хуманитарни цели.
22-месечниот Рио е роден со Даунов синдром, проблеми со дишењето и со цревата и има поминато низ операција, но тоа не ја брише насмевката од неговото лице.
Неговите родители, преку ангажманите на малото момче, шират прекрасна порака низ светот – дека секој може да направи разлика и дека секое дете е способно на неверојатни нешта.
„Сето ова е освежување, бидејќи најискрено го помислувавме најлошото кога првпат ни ја кажаа дијагнозата“ – рекол таткото Антони.
„Ја отвораме вратата за многу други како него да покажат дека ДА, можеш да направиш разлика“ – додал тој.
Мајката на Рио, Кимберли, многу се гордее со него и е пресреќна што лицата со хендикеп се застапени во рекламните кампањи. „Многу се гордееме со Рио, прекрасно е да се гледа како децата со хендикеп се претставувани во рекламните кампањи. Како и сите родители, само сакаме Рио да е среќен и да се чувствува вклучено, ќе продолжиме да се залагаме за него. Се надеваме дека Рио ќе им покаже на други деца дека без разлика на нивните способности, сите деца се убави и можат да постигнат неверојатни нешта“ – рекла мајката.
Преку Instagram профилот Life with the warRIOr, Кимберли и Антони ја подигнуваат свеста за лицата со Даунов синдром и го покажуваат нивното патување.
