Името на Крис Никич заслужено ќе биде запишано во Гинисовата книга на рекорди.
21-годишното момче стана првата личност со Даунов синдром која некогаш го има завршено триатлонот „Ајронмен“ (Железен човек). Крис пливаше 4 километри, возеше со велосипед 180 километри и трчаше маратон од 42 километри за да си ја исполни амбициозната цел. И сето тоа го направи за време од 16 часа, 46 минути и 9 секунди.
„Ги сруши бариерите додека докажуваше дека несомнено сè е возможно“ – напишаа од „Ајронмен“ Флорида за Крис.
Животот на Крис бил полн со предизвици уште од самиот почеток. На 5 месеци, тој поминал низ отворена операција на срцето, не одел самостојно до 4 години, а не можел да јаде цврста храна до 5 години. За Крис, триатлонот не бил само тешка трка, туку и начин за да ја подигне свеста за Дауновиот синдром и да го направи светот инклузивен.
„За Крис, оваа трка беше многу повеќе од целна линија и славење на победа. ‘Ајронмен’ послужи како платформа за да дојде еден чекор поблиску до неговата цел да живее живот на инклузија и лидерство. Ова е пример за другите деца и семејства кои се соочуваат со слични бариери, кој им докажува дека нема сон или цел кои се недостижни“ – вели неговиот татко Ник.
„За мене и за мојата сопруга, најважното нешто е дека мојот син е вклучен и дека има некаква цел. Возбуден сум што сум дел од неговото патување“ – додал тој.
Крис тренира со Ден Гриб, кој има завршено 16 триатлони Ironman. Пред трката, Крис тренирал 4-8 часа дневно.
„Си ја постигнав мојата цел, а сега сакам да им помогнам на други како мене“ – вели Крис, кој веќе тренира за Параолимписките игри во 2022 година.
„Ајронмен“ привлече пофалби од познати личности како и 33.000 нови следбеници на социјалните мрежи.
