Со љубов може да се надминат многу животни предизвици и да се случи навидум „невозможното“.
Хуманитарката, која пред 9 години спаси прегладнето детенце во Нигерија, покажа како изгледа тоа денес. Ања Рингрен Ловен сподели фотографија од денот кога го спаси малиот Хоуп, кој бил напуштен од семејството затоа што бил „вештер“, заедно со фотографии од неговиот изглед денес.
Хоуп денес живее во центарот основан од Ања заедно со 93 други деца, кои заедно учат, спортуваат и растат во среќни личности под раководство на активистите.
„Прелистајте за да видите што може да направи ЉУБОВТА. Училиштето на Хоуп ги славеше спортовите и сакав да споделам фотографија од него. Но, не можев да одберам која фотографија да ја споделам, бидејќи тој е многу згоден. Па, еве ви ги сите“ – напиша Ања.
Инспиративната хуманитарка е посветена на заштитување и спасување на деца во Нигерија обвинети за вештерство. Фотографијата од Хоуп која стана вирален хит низ светот ѝ го промени животот и ѝ ја донесе титулата „Најинспиративна личност“. На неа, Ања му дава вода на „детето-вештер“ пред да го одведе во болница, но никој не верувал дека тоа ќе преживее.
„Кога го ставивме во автомобилот, го погледнав мојот сопруг Дејвид и му реков дека треба да го крстиме Хоуп. Не сакав да умре без име. Заслужуваше да умре со достоинство“ – напиша Ања во својата книга.
Но, Хоуп не само што преживеа, туку има прекрасен живот и е опкружен со љубов.
