Пред четири дена, Виена беше мета на нов терористички напад. Вооружени лица започнаа пукање во близина на градската синагога, а потоа и на уште неколку локации од градот, стрелајќи во случајни лица кои беа гости во блиските ресторани и кафулиња.
Во вооружениот напад, животот го загубија најмалку четири лица, а 23 се повредени.
Луѓето кои беа сведоци на нападите уплашени бараа засолниште во најблиските објекти, па хотелот „Вандл“ ги отвори вратите и ги згрижи сите оние кои побараа помош.
Додека јавниот превоз беше откажан и многу лица не можеа да стигнат до своите домови, вработените во овој хотел без размислување им понудија помош.
„Вие ѝ понудивте безбедно место на мојата девојка и бесплатна соба вечерта на 2 наспроти 3 ноември. Ви благодарам што имате толку прекрасен персонал и менаџер и што ги згриживте луѓето кога најмногу имаа потреба од заштита“ – е еден од коментарите на Trip Advisor.
„Ви благодарам што ни понудивте заштита, прибежиште, пијалоци и место за да преноќиме во вчерашната опасна ситуација и сето тоа бесплатно. Прекрасен гест за солидарност“ – стои во коментарите на интернет.
Портирот од хотелот е мигрант од Сирија, па веднаш знаел како да ги смири испаничените лица. „Ако сум научил едно нешто, тоа е како да останам смирен во ваква ситуација“ – изјавил тој.
„Им кажав на луѓето дека се безбедни тука, полицијата дојде за кратко време и го чуваше влезот. Им објаснив дека овој хотел има преживеано две светски војни и дека има голем подрум каде можат да се скријат доколку е потребно“ – додал тој.
