Сијамски близначки добија шанса за нормален живот откако беа успешно раздвоени од доктори во Турција.
11-месечните Мирха и Минал од Пакистан се родија споени со главите. Не можејќи да најдат соодветен третман во татковината, родителите побарале помош од Турција, а нивниот апел го привлече вниманието и на претседателот Реџеп Таип Ердоган.
Предводени од педијатрискиот неврохирург од Англија, Овасе Џилани, како и од турските доктори Харун Демирџи и Хасан Мурат Ергани, тим од 60 медицински професионалци успешно ги одвои сестричките.
Операцијата траела 14 часа, а во неа учествувале доктори од повеќе држави.
„Доктор Џилани ни рече дека операцијата е возможна, но ние немавме средства за операција во Велика Британија. Џилани го контактираше Претседателот Ердоган, му ја објасни ситуацијата и благодарение на него дојдовме тука“ – рекле родителите кои се полни со благодарност кон сите вклучени во операцијата.
„Неопислива е радоста да се гледаат здравите насмеани лица на бебињата сега, во споредба со нивната состојба кога пристигнаа“ – рекол еден од докторите за турската новинарска агенција „Анадолија“.
„Децата се од друг крај од светот и немаа помош. Кога ме контактираа, реков дека ќе помогнеме. Донесовме луѓе од различни делови од светот во Анкара, ја направивме комплексната операција и имавме прекрасни резултати“ – рекол доктор Џилани.
