Храбро девојче ја доби битката со остеосаркомот, екстремно редок вид на рак на коските.
11-годишната Бела победнички заѕвони на ѕвончето во болницата во којашто се излекува откако персоналот во болницата ја испрати со песна. Видеото споделено онлајн насолзи многу очи и голем број интернет корисници ѝ посакаа долг живот и здравје.
„Остеосарком воин, Бела е најхрабрата суперхероина која постои“ – стои во описот на видеото.
На Бела ѝ била дијагностицирана лошата болест на 10-годишна возраст. Првиот симптом бил силна болка во коленото кој мајка ѝ мислела дека се должи на истегнат мускул или повреден лигамент, бидејќи таа била мажоретка.
За жал, болката била присутна со недели, па семејството решило да ја одведе Бела во болница. На 20 декември 2023 година ѝ бил дијагностициран рак и ѝ било забрането да ја користи ногата, бидејќи постоела голема веројатност од кршење на коската.
По два дена, Бела започнала да прима хемотерапии, а неколку месеци подоцна ѝ била направена операција и ѝ бил ампутиран дел од ногата. Девет месеци подоцна, храбрата хероина ја доби тешката битка и беше дочекана со прегратки од родителите и поголемиот брат.
Од болницата „UF Health“ во Флорида напишаа:
Бела имаше само 10 години кога ѝ беше дијагностициран остеосарком, редок рак на коските, откако имаше постојана болка во коленото. Она што изгледаше како обична повреда се претвори во болест која ѝ го промени животот и таа започна лекување во Детската болница „UF Health Shands“.
Во изминатите 9 месеци, Бела смело помина хемотерапии и комплексна операција, наречена ротациопластика, каде ѝ беше ампутиран дел од ногата, но нејзиното стапало повторно беше прикачено за да ѝ се помогне да се движи. Сега, 11-годишната Бела слави важно постигнување: заѕвони на ѕвончето, кое го означува крајот на нејзиното лекување.
Следно за Бела и за нејзиното семејство е заслуженото патување во забавен парк, шанса заедно да прослават за победата.
Нејзината храброст и нејзината сила ги инспирираа сите околу неа.
