Неслучајно сè повеќе луѓе низ светот стануваат приврзаници на јогата. Таа помага за подобрување на физичкото и психичкото здравје, флексибилноста, стабилноста, силата, надворешниот изглед, концентрацијата и расположението.
Најчесто кога некој ќе спомене јога, повеќето луѓе си замислуваат сложени пози, изведувани од некоја гимнастичарка што може да прави чуда со своето тело. Поради тоа, многу често се откажуваат од јогата уште пред да се обидат да ја применат. Но, вистината е дека постојат различни типови на јога и секој човек може да најде соодветен тип за себе.
Следуваат 8 јога пози кои се особено полезни за жените, а се толку лесни и едноставни што може да се практикуваат секој ден.
Застанете право и раширете ги нозете малку повеќе од еден метар. Прстите на левата нога треба да бидат насочени налево, а на десната нанапред. Подигнете ги рацете во висина на рамената и раширете ги. Дланките насочете ги надолу. Свиткајте го коленото на левата нога и спуштете се доволно за да оформувате агол од 90° со ногата (кај коленото). Задржете се во таа поза околу 20 секунди. За тоа време дишете длабоко. Потоа повторете го истото на другата страна.
Зошто е корисна: Оваа поза ќе ви овозможи да ги растегнете мускулите на внатрешните бутови, градите, стомакот и рамената. Резултатот е убаво тонирани мускули на рацете, нозете и во долниот дел на стомакот.
Раширете ги нозете во распон на колковите. Додека ги кревате рацете нагоре со дланките насочени една кон друга, свиткувајте ги колената и насочете го задникот наназад, исто како да седнувате на стол. Колената не треба да отидат понапред од прстите на нозете. Повлечете го стомакот навнатре и држете го грбот исправен. Задржете се во таа поза 20 секунди и дишете длабоко. Направете кратка пауза и повторете ја позата.
Зошто е корисна: Оваа поза е корисна за подобрување на положба на телото, затоа што учи како треба да биде исправен грбот. Со неа добивате убави цврсти нозе и поголема стабилност на телото.
Може да се каже дека оваа поза е комбинација од двете претходни. Застанете во поза 1, а потоа приближете ја десната рака кон левата, насочете ги дланките една кон друга и започнете да ги кревате двете раце нагоре, додека сте свртени налево. Задржете се во таа поза 30 секунди. Потоа повторете ја на другата страна.
Зошто е корисна: Со оваа поза ги растегнувате мускулите по целото тело и ги зацврстувате нозете и рацете.
Клекнете во кучешка поза. Рацете треба да ви бидат во распон на рамената, а прстите раширени. Полека започнете да ги подигате колената од подот и исправете ги целосно нозете. Вратете ги нозете наназад неколку сантиметри, а рацете поместете ги нанапред, за да застанете во правилна поза (како на сликата). Правете напори петиците да ги носите кон подот. Во текот на целото време внимавајте грбот да ви биде исправен. Дишете длабоко и задржете се во таа поза најмалку 40 секунди.
Зошто е корисна: Со оваа поза го зацврстувате горниот дел од телото. За време на оваа поза, колковите се повисоко од срцето, па тоа ја подобрува целосната циркулација.
Легнете на стомак. Поставете ги рацете во распон на рамената, точно под нив. Горниот дел од телото подигнете го со помош на рацете, а задниот со помош на прстите од нозете. Петиците обидете се да ги туркате наназад. Горниот и долниот дел од телото треба да ви бидат на иста висина. Задржете се во таа поза 10 секунди, а потоа исправете ги рацете во лактите. Сега, горниот дел на телото треба да ви биде повисоко од долниот. Задржете се во втората положба 50 секунди. Држете го грбот исправен и дишете длабоко.
Зошто е корисна: Оваа поза е едноставна, но бара малку повеќе издржливост. Го зацврстува горниот дел од телото и сите големи мускули на рацете, нозете и стомакот.
Седнете на подот и свиткајте ги колената. Наведнете го горниот дел од телото наназад и потпрете се на рацете. Подигнете ги нозете од подот, а потоа испружете ги рацете напред, така што да бидат паралелни на подот. Вашето тело треба да ја формира буквата V. Грбот држете го исправен и започнете да ги растегнувате нозете со исправени прсти. Задржете се во таа положба околу 30 секунди. Повторете ја 5 пати.
Зошто е корисна: Оваа поза ќе ви помогне да ги зацврстите мускулите во центарот, т.е. стомачните мускули, потоа мускулите на грбот и нозете.
Застанете исправени и раширете ги нозете малку повеќе од еден метар. Прстите од левата нога треба да бидат насочени нанапред, а од десната надесно. Наклонете се кон десната страна и поставете ја десната рака зад десната нога. Левата рака испружете ја исправена нагоре за да биде нормална на подот. Обидете се десната нога и двете раце да ви формираат права линија. Задржете се во оваа поза 20-30 секунди. Потоа повторете ја на другата страна.
Зошто е корисна: Веднаш ќе почувствувате растегнување на мускулите во центарот на телото. Освен нозете, и рацете понесуваат голем товар од оваа вежба, па резултатот е зацврстување на мускулите на рацете и нозете.
Седнете на подот со исправени нозе. Левата нога префрлете ја преку десната и поставете го стапалото веднаш до десното колено. Свртете го горниот дел од телото налево. Насочете ја левата рака налево, а десната рака свиткајте ја во лактот и поставете го лактот пред левото колено. Насочете ја главата налево и зачувајте го грбот прав. Дишете бавно и задржете се во таа поза 20-30 секунди. Потоа изведете го истото на другата страна.
Зошто е корисна: Со оваа поза ги растегнувате мускулите на грбот, вратот и рамената. Особено е полезна за подобрување на варењето на храната и зголемување на потокот на крв во долниот дел на стомакот.
