Џин Досон ќе ве инспирира да облечете тренерки и да започнете да вежбате. Џин пред четири дена наполни 100 години, но не се откажува од својата страст – јогата.
Инспиративната бабичка, која во минатото страдала од дискус хернија, започнала да вежба јога кога имала 67 години и е убедена дека на тоа се должи нејзиниот долг живот и подобрената здравствена состојба.
„Навистина ми го промени животот и ми помогна да ги излекувам болките. Порано имав проблеми поради дискус хернија, но практикувањето јога навистина ми помогна да се справам со тоа“ – вели Џин.
Досон, која до неодамна можела да прави и покомплицирани јога пози, била пример за сите кои присуствуваат на часовите со неа и често им велела: „Можете да го направите само она што можете да го направите“.
Часовите не само што ѝ подариле на активната Британка исправено тело, концентрација, флексибилност и енергија, туку и ѝ донеле куп нови пријатели во чие друштво ужива секој понеделник. Затоа, Џин не планира да се „пензионира“ од јогата. „Практикувањето јога ми помогна повеќе од сè и навистина уживам во друштвото секоја недела, па мислам дека ќе продолжам уште извесно време“ – додава таа.
